Akif Qurbanov: “Əliyev rejimi siyasi iradəni həbs yolu ilə susdurmağa çalışır”
“Toplum TV işi” üzrə həbsdə olan Demokratik Təşəbbüslər İnstitutunun rəhbəri, III Respublika Platformasının spikeri Akif Qurbanov həbsdə olduğu müddətdə ilk geniş müsahibələrindən birini verib. O, məhkəmə prosesindən, Azərbaycandakı siyasi vəziyyətdən, beynəlxalq münasibətlərdən və ölkədəki repressiya mühitindən danışıb.
Qurbanov hesab edir ki, Azərbaycanda məhkəmə sistemi müstəqil institut kimi fəaliyyət göstərmir və siyasi xarakter daşıyan işlərdə qərarlar hüquqi deyil, siyasi çərçivədə müəyyənləşir.
“Məhkəmə adlanan təsisatın nə həqiqi səlahiyyəti, nə müstəqilliyi, nə də hüququ təmin etmək imkanı var. Bizə açılan qondarma işdə hakimiyyət və prokuror bir tərəf kimi çıxış edir, biz və vəkillər isə hüquqi mövqeyimizi müdafiə edirik”, – deyə o bildirib.
“Qərarı yalnız bir nəfər verir”
Akif Qurbanov məhkəmə prosesinin nəticəsi ilə bağlı nikbin olmadığını deyib və Azərbaycandakı idarəçilik modelini sərt tənqid edib.
“Bu prosesin nə zaman bitəcəyini və hansı qərarın veriləcəyini nə hakimlər, nə də onların rəhbərləri bilir. Son qərarı yalnız ‘tək adam’ rejiminin sahibi verir”, – Qurbanov vurğulayıb.
O, Prezident İlham Əliyevə müraciət edərək siyasi motivli təqiblərə son qoymağa çağırıb.
“Daşı ətəyindən tökməyə səsləyirəm. Heç bir məsuliyyəti olmayan şəxsləri cəzalandırmaqdan vaz keçin. Əgər hansısa qərara görə məsuliyyət axtarırsınızsa, o zaman qərar verən şəxslər məsuliyyət daşımalıdır”, – deyə Qurbanov bildirib.
“Azərbaycanda siyasi proses məhv edilib”
III Respublika Platformasının spikeri hesab edir ki, Azərbaycanda siyasi mühit məqsədli şəkildə zəiflədilib.
Onun sözlərinə görə, hakimiyyət alternativ siyasi qüvvələrin, müstəqil medianın və vətəndaş cəmiyyətinin fəaliyyət imkanlarını məhdudlaşdırmaqla cəmiyyətdə qorxu mühiti yaratmağa çalışır.
Qurbanov bildirib ki, demokratik dəyişiklik üçün əsas məsələ müxtəlif qrupların birgə fəaliyyət göstərə bilməsidir:
“Partiyalar, vətəndaş cəmiyyəti, media və müxtəlif sosial qruplar ayrı-ayrılıqda deyil, ortaq dəyərlər ətrafında əməkdaşlıq etməlidir”.
Avropa ilə münasibətlər və hakimiyyətin siyasəti
Qurbanov Azərbaycanın Avropa Parlamenti ilə münasibətləri dayandırmaq qərarını da qiymətləndirib.
Onun fikrincə, bu qərar uzunmüddətli strategiyadan deyil, hakimiyyətin situativ reaksiyalarından qaynaqlanır.
“Bir neçə ay əvvəl Azərbaycan hakimiyyəti Avropa Parlamentinin qərarlarına əhəmiyyət vermədiyini deyirdi, qısa müddət sonra isə əlaqələri dayandırmaq qərarı verdi. Bu, ardıcıl siyasətin olmadığını göstərir”, – deyə o qeyd edib.
Qurbanov bildirib ki, Azərbaycanın Avropa ilə münasibətlərinin pisləşməsi ölkənin iqtisadi və siyasi maraqlarına təsir göstərə bilər.
“Həbs bizi məqsədimizdən döndərməyəcək”
Akif Qurbanov həbsdə olmasına baxmayaraq siyasi fəaliyyətindən geri çəkilməyəcəyini bildirib.
“Üçüncü Respublikanın qurulması, demokratik dövlətin yaradılması istiqamətində mübarizəmizi davam etdirəcəyik. Neçə il cəza verilməsindən asılı olmayaraq, bu yoldan dönməyəcəyik”, – deyə o bildirib.
Qurbanovun sözlərinə görə, dünyada gedən proseslər heç bir hakimiyyətin uzun müddət dəyişikliklərdən yayınmasına imkan verməyəcək.
“Qlobal prosesləri dayandırmaq mümkün deyil. Azərbaycanda dəyişikliklərin açarı da cəmiyyətin öz əlindədir”, – deyə o əlavə edib.
“Demokratiya verilən deyil, qazanılan dəyərdir”
Qurbanov müsahibəsinin sonunda cəmiyyətə müraciət edib.
O bildirib ki, demokratiya insanların mübarizəsi nəticəsində formalaşır və azadlıqlar uğrunda mübarizə davam etdirilməlidir.
“Demokratiya fəal prosesdir. Azadlıqlar, ədalət və hüququn üstünlüyü üçün mübarizə aparmaq lazımdır. Hər qaranlığın sonunda işıq var”, – deyə Akif Qurbanov bildirib.
Qeyd edək ki, Akif Qurbanov “Toplum TV işi” çərçivəsində ittiham olunur. O və digər təqsirləndirilən şəxslər ittihamları siyasi motivli hesab edir və özlərini təqsirli bilmirlər. Beynəlxalq insan hüquqları təşkilatları isə Azərbaycanda son illərdə jurnalistlərə, fəallara və vətəndaş cəmiyyəti nümayəndələrinə qarşı təzyiqlərin artdığını bildiriblər.
