Həbsdəki jurnalist Teymur Kərimovun səhhəti pisləşib: Tibbi yardım əvəzinə “doşab məsləhəti”
“Kanal 11” internet televiziyasının həbsdə olan rəhbəri Teymur Kərimovun səhhətində ciddi problemlər yaranıb. Jurnalistin yaxınlarının verdiyi məlumata görə, onun qaraciyərində kəskin narahatlıqlar baş qaldırsa da, müəssisədə lazımi tibbi müayinə və müalicə aparılmır.
Ailə üzvləri bildirirlər ki, jurnalist ağrılardan şikayət etdikdə ona peşəkar tibbi yardım göstərilməsi əvəzinə “doşab iç, keçib gedəcək” cavabı verilib.
Həbs prosesi və azaldılan cəza müddəti
İttiham: Teymur Kərimov 2023-cü ilin dekabrında saytdan material silmək müqabilində pul tələb etməkdə (Cinayət Məcəlləsinin 182-ci maddəsi — hədə-qorxu ilə tələb etmə) təqsirləndirilərək saxlanılıb.
İlk hökm: Bakı Ağır Cinayətlər Məhkəməsi onu 8 il müddətinə azadlıqdan məhrum edib və əlavə olaraq 2 il jurnalistika ilə məşğul olmasına qadağa qoyub (eyni iş üzrə mühakimə olunan reportyor İstək Totiyevaya isə şərti cəza verilib).
Məhkəmə qərarları: 2025-ci ilin mayında Bakı Apellyasiya Məhkəməsi cəzanı 7 ilə, həmin ilin dekabrında isə Ali Məhkəmə daha 2 il azaldaraq 5 ilə endirib.
Kərimov irəli sürülən ittihamları rədd edir və həbsini peşə fəaliyyəti — sosial etirazları, vətəndaş hüquqlarının pozulmasını və polisin müharibə veteranlarına qarşı zorakılıq faktlarını işıqlandırması ilə əlaqələndirir. Saxlanılarkən təzyiq və hədələrlə üzləşdiyini bildirən jurnalistin bu iddiaları Daxili İşlər Nazirliyi tərəfindən təkzib olunub.
