Hacı Alamdar Bünyatova qarşı “İran” ittihamı ilə qaralama kampaniyası başladılıb
Hacı Alamdar Bünyatovun Prezidentin köməkçisi Hikmət Hacıyev və xarici işlər naziri Ceyhun Bayramovla dialoqundan sonra ona qarşı hakimiyyətə yaxın media resurslarında və sosial şəbəkələrdə hücum kampaniyasının başladığı bildirilir.
Bünyatov görüş zamanı Nardaran hadisələri, “Sea Breeze” layihəsi, həbsdə olan jurnalistlər və qadın məhbuslarla bağlı suallar səsləndirib. Onun çıxışını şərh edən jurnalist Abid Qafarov bildirib ki, Bünyatov yaxşı bildiyi və detallarına bələd olduğu mövzuları gündəmə gətirməklə doğru seçim edib.
Qafarovun fikrincə, hakimiyyət nümayəndələri verilən suallara mahiyyəti üzrə cavab verməyib, mövzunu yayındırmağa və ümumi ifadələrlə məsuliyyətdən yayınmağa çalışıblar.
O bildirib ki, dialoqdan sonra bəzi saytlar, sosial şəbəkə səhifələri və jurnalistlər Hacı Alamdar Bünyatovu “İranla əlaqəli olmaqda” ittiham etməyə başlayıblar. Qafarov bu iddiaların hər hansı sübutla əsaslandırılmadığını və qaralama kampaniyasının tərkib hissəsi olduğunu vurğulayıb.
Jurnalist xatırladıb ki, oxşar ittiham üsullarından 2017-ci ildə Tərtər hadisələri zamanı da istifadə olunub. Onun sözlərinə görə, həmin dövrdə ayrı-ayrı media nümayəndələri saxlanılan şəxsləri məhkəmə qərarı olmadan “xain” və “agent” kimi təqdim edərək cəmiyyətdə işgəncə və qanunsuzluqlara haqq qazandırmağa çalışıblar.
Qafarov qeyd edib ki, eyni yanaşma bu gün həbs olunan dindarlara və hakimiyyəti tənqid edən şəxslərə qarşı tətbiq olunur. İnsanlara sübut olmadan “İran agenti” damğasının vurulmasını o, təhlükəli və qeyri-etik jurnalistika nümunəsi adlandırıb.
Paylaşımda həbsdə olan qadın jurnalistlər məsələsinə də xüsusi diqqət çəkilib. Bildirilib ki, Bünyatov qadın məhbusların taleyi barədə sual səsləndirsə də, hakimiyyət nümayəndələri bu suala cavab verməyiblər.
Abid Qafarov həmçinin Azərbaycanda həbsdə olan 40 jurnalist və bloqerin azadlığı üçün başladılan petisiyanı imzalamağa çağırıb. Onun sözlərinə görə, petisiyanı AŞPA-nın xorvatiyalı üzvü İvan Raçan da imzalayıb.
