AXCP üzvünün 30 sutka həbs edildi
Azərbaycan Xalq Cəbhəsi Partiyasının (AXCP) üzvü Anar Ərkivanın 30 sutka inzibati həbs cəzası aldığı bildirilir.
Məlumata görə, onun barəsində İnzibati Xətalar Məcəlləsinin 535.1-ci maddəsi (polis əməkdaşının qanuni tələbinə tabe olmama) ilə protokol tərtib olunub.
AXCP Nəzarət-Təftiş Komissiyasının sədri Murad Sultanlı bildirib ki, hadisə Anar Ərkivanın avtomobil idarə etdiyi zaman baş verib. Onun sözlərinə görə, Dövlət Yol Polisi əməkdaşı Ərkivanı saxlayaraq sükan arxasında telefonla danışdığını iddia edib və cərimə tətbiq etmək istəyib.
Ərkivan isə bu ittihamla razılaşmayıb. Bundan sonra polis əməkdaşının əlavə qüvvə çağırdığı və onun Nərimanov Rayon Polis İdarəsinin 17-ci Polis Şöbəsinə aparıldığı bildirilib.
Məlumata əsasən, bir sutka polis şöbəsində saxlanıldıqdan sonra Nərimanov Rayon Məhkəməsinin qərarı ilə onun barəsində 30 sutka inzibati həbs qərarı verilib.
AXCP tərəfi həbsi siyasi motivli hesab edir və Anar Ərkivanın ittihamların əsassız olduğunu bildirir. Rəsmi qurumlardan məsələ ilə bağlı açıqlama verilməyib.
Qeyd edək ki, Anar Ərkivan bu ilin fevralında da 30 sutka inzibati qaydada həbs edilmişdi. AXCP üzvləri son illərdə müxtəlif inzibati ittihamlarla saxlanıldıqlarını bildirir, hakimiyyət isə bu şəxslərin siyasi fəaliyyətinə görə deyil, törətdikləri iddia olunan hüquq pozuntularına görə məsuliyyətə cəlb olunduğunu açıqlayır.
Hüquq müdafiəçilərinin hazırladığı siyahılarda Azərbaycanda siyasi məhbus kimi qiymətləndirilən şəxslərin olduğu bildirilir. Rəsmi Bakı isə ölkədə siyasi məhbus anlayışının tətbiq edilməsini qəbul etmir.
