Siyasi məhbus Elzamin Salayev yenidən karserə salınıb: “Problemləri deyən yox, problemlərin özü aradan qaldırılmalıdır”

Siyasi məhbus kimi tanınan Elzamin Salayevin yenidən cərimə kamerasına (karserə) salındığı bildirilir.

Məlumata görə, buna səbəb onun saxlanıldığı 11 saylı Cəzaçəkmə Müəssisəsindəki problemləri ictimailəşdirməsi olub. Salayevin bildirdiyinə görə, o, müəssisədə məhbusların ağır saxlanma şəraiti, mövcud çatışmazlıqlar və idarəetmədəki problemlər barədə məlumatları ictimaiyyətə çatdırdığı üçün cəzalandırılıb.

Onun sözlərinə görə, yay aylarında məhbusların yerləşdirildiyi baraklarda kondisioner sistemi yoxdur. Qızmar havalarda insanlar havasız şəraitdə qalmağa məcbur olur. Baraklarda isə köhnə, sovet dövründən qalmış ventilyatorlardan istifadə edilir.

Məlumata görə, müəssisədəki problemlərin həlli əvəzinə, həmin problemləri səsləndirən şəxsin cəzalandırılması yolu seçilir.

Hüquq müdafiəçiləri və məhbus yaxınları dəfələrlə bildiriblər ki, cəzaçəkmə müəssisələrində saxlanma şəraiti, tibbi xidmət, qidalanma və məhbusların hüquqlarının qorunması ilə bağlı məsələlər müstəqil şəkildə araşdırılmalıdır.

Elzamin Salayevin tərəfdarları hesab edir ki, onun karserə salınması müəssisədəki vəziyyətlə bağlı səsləndirilən iddiaların araşdırılması zərurətini daha da artırır.

Onların fikrincə, normal yanaşma şikayətlərin araşdırılması, çatışmazlıqların aradan qaldırılması və məhbusların hüquqlarının təmin edilməsidir. Problemləri gündəmə gətirən şəxsin cəzalandırılması isə həmin problemlərin daha çox sual doğurmasına səbəb olur.

Qeyd edək ki, Elzamin Salayev daha əvvəl də müxtəlif vaxtlarda saxlanma şəraiti ilə bağlı açıqlamalar verib və buna görə təzyiqlərlə üzləşdiyini bildirib. Rəsmi qurumlar isə bu iddialarla bağlı ayrıca açıqlama verməyib.